REGURDAR – In project da scriver da Pro Senectute Grischun

Foto: Pierre Oettli, Chur

Reminiscenzas dal Grischun – Istorgias che restan

Istorgias raquintan da la vita – e da quai che resta. Cun il project da scriver «Regurdar» ha Pro Senectute Grischun en l’emprima mesadad da l’onn 2026 envidà persunas pli veglias da scriver e inoltrar texts persunals. La premissa per ils texts inoltrads era in connex tematic cun il Grischun. Pussibel era la participaziun da tut las persunas a partir da 65 onns; in domicil en Grischun n’era betg ina premissa.

Ils texts pudevan vegnir inoltrads en tudestg, rumantsch u talian e duevan avair ina lunghezza da circa duas paginas A4. E: il project na sa chapiva betg sco concurrenza, mabain sco invitaziun da scriver, da cundivider e da sa regurdar.

L’interess e la gronda participaziun ans fan fitg plaschair: En tut ans èn arrivadas 80 contribuziuns da senioras e seniors da tut la Svizra, en tut las trais linguas chantunalas. Nus essan engraziaivels per l’avertura cun la quala questas reminiscenzas èn vegnidas cundivididas cun nus, sco er per las conversaziuns e las sentupadas ch’èn resultadas da quai. Las contribuziuns ans han commovì, han creà contexts e relaziuns ed ans han invidà a reflectar.

Fin festiv dal project da scriver il Di internaziunal da las persunas attempadas 2026 a Cuira

Il 1. d’october 2026, il Di internaziunal da las persunas attempadas, èn las auturas ed ils auturs dal project da scriver vegnids undrads cun ina occurrenza festiva en il B12 a Cuira. 60 auturas ed auturs sco era var 40 persunas accumpagnantas èn stads preschents. L’autura grischuna enconuschenta Romana Ganzoni, che aveva accumpagnà il project sin plaun litterar, ha manà tras il suentermezdi. Cun gronda sensibilitad ed appreziament ha ella preschentà tut las contribuziuns e dà a mintga autura ed a mintga autur la pussaivladad da prender la parola. L’occurrenza è vegnida accumpagnada musicalmain da Martina Hug (chant) e Georg Commerell (pianoforte).

Equipads cun in attestat da renconuschientscha che cuntegneva ina appre­ziaziun persunala da Romana Ganzoni, sco era cun in’antologia stampada cun ils texts dal project da scriver, han las auturas ed ils auturs duvrà l’apero che ha suandà per emprender d’enconuscher in l’auter e per barattar lur experientschas.

Sustegn e engraziament

Il project è vegnì sustegnì da la Fundaziun Hatt-Bucher, dal fonds da contribuziuns da la Banca Chantunala Grischuna (GKB), da la Genossenschaft Migros Ostschweiz, da la Promoziun da la cultura dal Grischun sco era da la Fundaziun Proterra.

A questa occasiun engraziain nus anc ina giada cordialmain a tut las auturas ed ils auturs per avair partì lur regurdientschas, sco era a tut las persunas che han contribuì a la realisaziun da quest project spezial.

Cudeschet

Il cudeschet avant maun è vegnì stampà per las auturas ed ils auturs participads en occasiun da la festa dal project ils 1. d’october 2026, en ina ediziun da 100 exemplars. El cumpiglia 75 da las contribuziuns inoltradas.